Ku-ba-ku phail gaii baat shanasaii ki
Us ne Khushbu ki tarah meri paziraii ki
Kaise kah duun ke mujhe chhod diya hai us ne
Baat to sach hai magar baat hai rusvaii ki
Vo kahiin bhi gayaa lauta to mere paas aaya
Bas yahii baat hai achchhi mere harjaii ki
Tera pahlu tere dil ki tarah aabaad rahe
Tujh pe guzre na qayaamat shab-e-tanhaii ki
Us ne jaltii huii peshanii pe jo haath rakha
Ruh tak aa gaii tasiir masihaii ki
No comments:
Post a Comment